Федералды тергеу бюросының (FBI) бұрынғы директоры Джеймс Коми АҚШ президенті Дональд Трамп бюрода проблема болып жатыр деп өтірік айтты дейді. АҚШ сенатының барлау комитеті маусымның 8-інде FBI- дің бұрынғы басшысы Джеймс Комиді тыңдаған. Комиді мамырда президент Дональд Трамп қызметінен алып тастаған.
Америкалықтар бұл тыңдауға қатты мән беріп отыр. Өйткені Коми FBI-ді басқарып тұрғанда Ресейдің АҚШ-тағы президент сайлауына ықпал ету ықтималдығы туралы істі тексере бастаған. Трампқа қарсы саясаткерлер президент осындай жолмен тәуелсіз тексеруге кедергі жасамақ болды деп есептейді.
“Ресейге қатысты істі тексеру тәсілім оған (президент Трампқа – ред.) салмақ түсіріп, қитығына тигесін жұмыстан шығарылдым деп білем” деді Коми.
Трамп FBI-дің бұрынғы басшысының хатына қатысты әзірше пікір білдірген жоқ. Оның адвокаты Марк Касовитц президент өзін арнайы қызмет орындары оның әкімшілігі мен Ресейдің ықтимал байланысын тексеруге қатысты зерттеу объектісі деп танымайтынын Комидің растағанына разы екенін хабарлады.