Қызылордада алтын бұйымдарды ұрлап, 26 миллион теңге көлемінде шығын келтірген екі азамат ұсталды.
Бұл туралы Қызылорда қалалық Ішкі істер басқармасының баспасөз қызметі хабарлады.
Өңірлік полиция қызметкерлерінің жүргізген іздестіру жұмысы кезінде жалпы құны 26 млн 180 мың теңгені құрайтын әшекейлерді қолды қылған екі азамат ұсталды. Оқиға 2017 жылғы 30 қаңтар күні қала орталығындағы сауда үйлерінің бірінде орын алған. 22 және 23 жастағы азаматтар алдын ала сөз байласа отырып, сауда үйінің жертөлесіндегі пластик терезені бұзып ашып, алтын бұйымдар қойылған шыны сөрелерді сындырып, ішіндегіні қолды қылды.
Қазір оларға қатысты ҚР Қылмыстық Кодексінің 188-бабының 4-бөлігі негізінде қылмыстық іс қозғалып, сотқа дейінгі тергеу-тексеру амалдары жүргізілуде.
Бәтес Ерболат