Қызылордада қарасора өсіруді кәсіпке айналдырған 60 жастағы азамат ұсталды.
Бұл туралы облыстық ішкі істер департаментінің баспасөз қызметі хабарлады.
Тамыз айының 18 күні аумаққа барлау жұмыстарын жүргізуде полиция қызметкерлері Сырдария ауданы Шіркейлі ауылдық округінен 6 шақырым қашықтықтағы құмдардың арасынан 100 шаршы метрге созылған есірткі алқабын анықтады. Оқиға орнынан егіп-баптау жұмыстарымен айналысушы 1957 жылы туылған азамат ұсталды. Айғақ зат ретінде алынған 47 түп шөптектес затқа сараптама тағайындалып, нәтижесінде жалпы салмағы 47 келіні құрайтын, құрамында есірткі заты бар сора өсімдігі екендігі нақтыланды.
1600 шаршы метрге созылған бірінші есірткі алқабынан 700 түп, екінші алқаптан 78 түп өсімдік алынып, ол сараптама қорытындысымен құрамында есірткі заты бар сора өсімдігі екендігі нақтыланды.
Қазіргі уақытта, сезікті Сырдария аудандық ішкі істер бөлімінің уақытша ұстау абақтасына қамаққа алынды. Аталған дерек ҚР Қылмыстық кодексінің 300-бабы 2-бөлігі, 296-бабы 4-бөлігімен сотқа дейінгі тергеп-тексерудің бірыңғай тізіліміне тіркеліп, сотқа дейінгі тергеп-тексеру амалдары жүргізілуде.