Қостанайда сауда орталығында тұрақта тұрған «Ауди» жанып кетті

Қостанайда сауда орталығының жанында тұрған «Ауди» маркалы автокөлік өртеніп кетті, деп хабарлайды ҚазАқпарат тілшісі.

Оқиға Абай көшесіндегі «Емшан» сауда орталығының маңында болған.

Куәгерлердің айтуынша, тоқтап тұрған көліктен түтін білініп, сәлден кейін өрт шыққан. Олар бірден өрт сөндірушілерді шақырды. Қостанай облысы ТЖД баспасөз хатшысы Меруерт Балғинаның сөзінше, қызыл жалын 2 шаршы метр аумақты қамтыған.

«Бүгін Абай көшесіндегі 34-үйдің қасында тұрған «Ауди-80» маркалы көлік жанып кетті. Алдымен, машинаның қозғалтқыш бөлігі тұтанған. Өрт сағат 14:07-де толықтай сөндірілді», – деп хабарлады Балғина агенттік тілшісіне.