Қазалы: су басқан мектепте сабақ тоқтатылды
Қызылорда облысы, Қазалы ауданының Аранды ауылындағы №97 мектеп аумағын су басуы салдарынан, сабақ уақытша тоқтатылды, деп хабарлайды облыстық әкімдіктің баспасөз қызметі.
Облыс əкімінің орынбасары С. Сүлейменов, облыстық жұмылдыру дайындығы басқармасының басшысы С. Сермағамбетов жəне облыстық төтенше жағдайлар департаментінің бастығы О. Бержанов бастаған жұмыс тобы аймақтың солтүстік аудандарында су тасқынының алдын алу жұмыстарын пысықтау барысында Арандыдағы №97 мектеп аумағын су басты деген хабарламаға сəйкес, оқиға орнына барды.
Су басқан мектеп
Су алған аумақ пен мектеп ғимаратының техникалық жағдайымен танысқан комиссия мүшелері нысанға түскен сызатқа және еденнің көтеріліп кетуіне байланысты ғимаратта оқу процесін тоқтату туралы шешім қабылдады.
Енді облыс əкімінің тапсырмасына сəйкес, құрылған сарапшылар комиссиясы мектептің техникалық жағдайын кешенді түрде зерттеп, оқиғаның себебін анықтайды.
Дегенмен облыстық білім басқармасы оқушылардың білім алу процесі тоқтамайтынын мəлімдеді. 12 наурыздан бастап, мектеп мұғалімдері мен 98 оқушысы көршілес Қожабақы ауылындағы №25 мектептің екінші ауысымында оқиды.
Ұстаздар құрамы мен оқушыларды тасымалдау үшін Қазалы ауданы əкімдігінен арнайы көлік бөлінген.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе