Қазақтың белгілі балалар ақыны Ескен Елубаев қайтыс болды.
Бұл туралы Қазақстан Жазушылар одағының мүшесі, сатирик Бейбіт Сарыбай Фейсбуктағы жеке парақшасында хабарлады.
«Белгiлi балалар ақыны Ескен Елубай ағамыз қайтыс болды. Қоштасу рәсімі ертең 10:00-де Жазушылар одағында болады», делінген хабарламада.
Ең алғашқы өлеңі 1958 жылы республикалық «Ара» журналында жарияланды. Негізінде ақын шығармашылығын балалар тақырыбына арнады. Оның «Болатбек» пьесасы республикалық қуыршақ театрында қойылған.
Халықаралық «Алаш» әдеби сыйлығының лауреаты (1994). Ұлттық «Астана – Бәйтерек» конкурсының екі дүркін бірінші жүлдегері (2007-2008), Халықаралық «Дарабоз» бәйгесінің екінші жүлдегері (2008). «Қазақстан Тәуелсіздігіне 10 жыл» медалімен марапатталған, Мемлекеттік грант иегері болған. Қырықтан астам кітабы қазақ және орыс тілдерінде жарық көрген.
«Балабек», «Асар» пьесалары республиканың көптеген театрларында қойылып келеді. «Саған күшік керек пе?» кинофильмі автордың пьесасы бойынша түсірілген.
Шығармалары қазақ және орыс мектептеріне арналған оқулықтарға енген.