Қазақстанның жаңа тарихын жүйелі зерттеген жөн – Мемлекет басшысы

Бұл туралы ол  “Егемен Қазақстан” басылымында жарық көрген «Тәуелсіздік бәрінен қымбат» атты мақаласында жазды.

– Елбасы сол кездегі саяси, экономикалық, әлеуметтік, демографиялық және басқа да жағдайларға байланысты жеті рет емес, жетпіс рет өлшеп, бір рет кесуге мәжбүр болды. Біз тығырықтан шығар жолдың саңылауы да көрінбейтін қиын күндерден қақтығыс пен қантөгіске ұрынбай аман шығып, ешкімге есемізді жібермей, жаңа сипаттағы Қазақ мемлекетін құрдық. Бүгінгі және болашақ ұрпақ мұны әрдайым біліп отыруы керек, – деді президент.

Сол үшін Қазақстанның жаңа тарихы жүйелі зерттеуді қажет ететінін айтты.

– Шынына келсек, Тәуелсіздік жылдарында бірнеше рет қолға алынғанына қарамастан, ұлттық мүддемізге сай келетін көп томдық жаңа тарихымыз әлі толық жазылған жоқ. Оның тұжырымдамасын бұған дейінгі олқылықтарды ескере отырып қайта қарап, жаңа ғылыми ұстанымдар мен жаңалықтардың негізінде тыңнан жазатын уақыт әлдеқашан келді. Барлық оқулықтар осындай іргелі еңбекке негізделіп әзірленеді. Бұл – ұлт шежіресін дәріптеу тұрғысынан алғанда стратегиялық маңызы бар мәселе, – деп атап өтті Тоқаев.

Сондықтан,

Қазақстанның академиялық үлгідегі жаңа тарихын жазуды дереу бастау

қажеттігі туындап отырғанын жазды.

Сонымен қатар, шетел аудиториясына арналған Қазақстанның қысқаша тарихын жазып, әлемнің негізгі тілдеріне аударуды ұсынды. “Бұл – қазақтың сан ғасырлық шынайы тарихын әлемге танытудың бірден-бір жолы”, – деп есептейді мемлекет басшысы.