«Қазақстанның 100 жаңа есімі» жобасының екінші айналымына Ақмола облысынан 19 үміткер өтті. Қазір аймақта олардың еңбектерін дәріптеу жұмыстары жүргізіліп жатыр.
Облыстық «Арқа ажары» және «Акмолинская правда» газеттері осы өңірден „Қазақстанның 100 даңа есіміне„ ұсынылған үміткерлердің тізімін жариялады. Солардың бірі – Наталья Дементьева. Ол 15 жылдан бері қазақ тілі мен әдебиеті пәнінен сабақ беріп келеді. Қазақшаның майын тамызатын Наталья Дементьева қазір оқушылардың жүрегін жаулап алған. Балалар ұстаздарының көркем мінезі мен әуезді үніне тәнті. Наталья әр баланың көңілін таба біледі.
– Шыңғыс ханның сөзін есіме түсіріп отырмын. Ол былай деген: «Бастасаң, қорықпа. Қорықсаң, бастама». Сондықтан әрқашан да осы ұстанымды мен де ескере отырып, өмір сүріп жатырмын. «100 жаңа есім» республикалық байқауы сияқты осындай сайыстардың біздің, жалпы қазақстандықтардың өмірінде алар орны ерекше. Өйткені әртүрлі салаларда қызмет ететін, еліміздің дамуы үшін өзінің үлесін қосатын адамдар өте көп. Бірақ олардың есімдерін біз біле алмаймыз.
«100 жаңа есім» жобасына Ақмола облысынан ең алғашында 179 адам ұсынылған екен. Алайда екінші айналымға тек 19 үміткер ғана өтіп отыр. Барлығы да аймақта абыройлы, еңбегімен елдің батасын алған тұлғалар.
Жазира Сейтмағанбетова, «Қоғамдық келісім» КММ баспасөз хатшысы:
– Бұл тұлғалардың арасында медицина саласынан, ғылым саласынан, білім және спорт саласынан шыққан тұлғалар бар. Осы тұлғалардың өмірбаянын, олардың Қазақстанның тәуелсіздігіне қосқан үлесін жариялау үшін мақалалар жазылып, олардан арнайы сұхбат алып жатыр. Олармен арнайы кездесулер, отырыстар өткізіп жатыр. Жалпы, жобаның шарты бойынша үміткерлерге онлайн дауыс беру 10-қарашаға дейін жалғасады. Содан кейін сарапшылар соңғы айналымның қорытындысын жасап, Қазақстанның 100 жаңа есімін елге жариялайтын болады.
Ал Ақмола облысынан қазіргі 19 үміткердің кем дегенде жартысына жуығы ақтық сынға өтеді деген үміт бар.