Алматы прокуроры және Оңтүстік Қазақстан, Ақтөбе облыстары прокурорларының орынбасарлары қызметінен босатылды.
Сонымен қатар, кейбір облыс прокурорлары мен олардың орынбасарлары тәртіптік жауапкершілікке тартылды, деп хабарлайды ҚР Бас прокуратурасының баспасөз қызметі.
«ҚР Бас прокурорының бұйрығымен Алматы қаласының прокуроры Ғабит Миразов тәртіпке қарама-қайшы әрекеттері үшін қызметінен босатылды, сонымен қатар, Ақтөбе облысы прокурорының орынбасары Данияр Сыздықов пен ОҚО прокурорының орынбасары Әбіл Қожахметов қылмыстық процесте жүйелілікті бұзып, қызметте бақылау ісін дұрыс ұйымдастырмағаны және мемлекет мүддесі үшін жұмыс істемегені үшін қызметтерінен босатылды», – делінген хабарламада.
«Ақтөбе облысының прокуроры Марат Қайыбжанов, Ақмола облысының прокуроры Тимур Ташимбаев, СҚО прокуроры Берік Асылов, Павлодар облысы прокурорының орынбасары Бауыржан Мырзакеров, Алматы облысы прокурорының орынбасары Саян Бәкіров, Қызылорда облысы прокурорының орынбасары Жасұлан Еламанов, Атырау облысы прокурорының орынбасары Серік Шалабаев пен Мұрат Төлеубаев, Маңғыстау облысы прокурорының орынбасары Асқар Досекенов және Тараз қаласының прокуроры Бекзат Сейілханов, Қарағанды қаласы Қазыбек би ауданының прокуроры Думан Қаржаспаев әртүрлі тәртіптік жауапкершілікке тартылды», – делінген хабарламада.