Бүгін ҚР Мәдениет және спорт министрі Арыстанбек Мұхамедиұлы украиналық «Голос. Діти» шоуының жеңімпазы Данэлия Төлешовамен кездесті.
Кездесуде Мұхамедиұлы Данэлия Төлешованы «Голос. Дiти» шоуындағы жеңісімен құттықтап, оған Елбасының сәлемін жеткізді.
«Мәдениет және спорт саласындағы кез-келген жетістіктер Қазақстан үшін өте маңызды. Данэлия, құттықтаймыз сені. Данэлияны Елбасымыздың және бүкіл қазақстандықтар атынан үлкен жетістігімен құттықтаймыз. Көп рақмет, Мемлекет басшысы Нұрсұлтан Назарбаев 15 желтоқсанда Тәуелсіздік күніне орай өткен салтанатты концерт кезінде сенің өнеріне тәнті болғанын айтуын сұраған еді. Данэлия 15-желтоқсанда Астанаға келіп, өнер көрсетті. Біз онымен әріптестігімізді бастап кеттік. Сол күні ол түнде концерттен кейін ұшып кетті. Тамаша өнер көрсетті» – деп атап өтті министр.
Сөйткен министр әншіге ең бірінші кезекте әндерін сақтайтын дүние аса қажет екенін айтып, жеңімпаз бүлдіршінге iPad сыйлады әрі болашағы зор қыздың Балалар Евровидениесіне қатысатынын да айтып қалды.
Ал Дәнелінің анасы: „Қазақша ән орындайық десек, автор таппай жатырмыз„ деп өздерін мазалаған мәселені айтты деп хабарлады Sputnik Қазақстан.
„… Туған ана тілімізде ән жаздырсақ па дейміз. Өкінішке қарай, бізбен әріптесе жұмыс істейтін автор таппай жатырмыз әзірге„, – деді Елена Төлешова.
Министр әнші қыздың анасына бұл ретте алаңдамай-ақ қоюына кеңес берді.
“Дәнеліге ән жазғысы келетін композиторлар табылады. Оған сенімдімін. Оған Димаштың жайы куә. Студияға қатысты да проблема болмайды, Алматы дей ме, Астана дей ме, айтсаңыздар болды, ол жағынан көмектесіп жібереміз„ – деді Арыстанбек Мұхамедиұлы.
Естеріңізге сала кетейік, алматылық 11 жасар Данэлия Төлешова Украинадағы «Голос. Діти» ән байқауында жеңіске жеткен еді.