Ұлттық комиссия төрт жұмысшы тобынан тұрады. Олар орфография, әдістемелік, терминжасам және сараптамалық-техникалық бағытта жұмыс істейтін болады.
Бұл туралы ҚР Үкіметінің баспасөз қызметі хабарлады.
„Ұлттық комиссия Үкімет жанындағы консультативтік-кеңесші орган болып табылады. 16-қарашада Үкімет үйінде ҚР премьер-министрі Бақытжан Сағынтаевтың төрағалығымен қазақ тілі әліпбиін латын графикасына көшіру жөніндегі Ұлттық комиссияның бірінші отырысы өтті„ – делінеді ҚР премьер-министрінің ресми сайтында.
Бақытжан Сағынтаевтың төрағалығымен комиссия құрамына төрағаның орынбасары — ҚР премьер-министрінің орынбасары Ерболат Досаев, сонымен қатар ҚР Президенті Әкімшілігінің, “Нұр Отан” партиясының, ҚР Парламентінің, жоғарғы оқу орындарының, бұқаралық ақпарат құралдарының, қоғамдық ұйымдардың, белгілі ғалымдар мен қоғам қайраткерлері тартылды. Комиссияның жұмыс органы ҚР мәдениет және спорт министрлігі болып табылады.
“Латын әліпбиіне көшу — еліміз үшін айрықша мәні бар тарихи оқиға. Елбасы айтқандай, халқымыз сан мың жылдық тарихында ешқандай сыртқы ықпалсыз, өз еркімен, жалпыхалықтық талқылаумен, тұңғыш рет әліпбиін ауыстырып отыр. Оны жүзеге асыру — біз үшін зор мәртебе, әрі үлкен жауапкершілік”, — деп атап өтті Бақытжан Сағынтаев.
Отырыс барысында қойылған міндеттерді жүзеге асыру үшін төрт арнайы жұмыс тобын құру туралы шешім қабылданды:
Біріншісі —орфографиялық (қазақ әліпбиін латын графикасына көшіруде орфография мен орфоэпия ережелерін дайындау үшін).
Екіншісі — әдістемелік (латын әліпбиін үйрету және оқыту әдістемесін жасап, оны білім беру жүйесіне біртіндеп енгізу үшін).
Үшіншісі — терминжасам (латын графикасының негізінде қазақ тілінің терминологиялық базасын жүйелеу үшін).
Төртіншісі — сараптамалық-техникалық (латын графикасын ІТ-технология талаптарына сәйкес келтіру үшін).
Жұмыс топтарына тіл білімі саласының кәсіби мамандары да тартылатын болады.