Қарағандыда заңсыз несие тіркеген банктің үш қызметкері сотталды

Қарағанды қаласының Қазыбек би аудандық сотында несие арқылы алаяқтық жасаған үш күдіктіге қатысты қылмыстық іс қаралды.

Бұл туралы облыстық соттың сайтында мәлімет жарияланды.

Қылмыстық топтың көшбасшысы 2013 жылдың маусымынан 2015 жылдың тамызы аралығында «Ресей Сбербанкі» АҚ еншілес банкі бөлімшесінің қауіпсіздік және ақпаратты қорғау бөлімінің басшысы лауазымын атқарған. Өзінің қызметтік өкілін пайдаланып, ол «Ресей Сбербанкі» АҚ-ға қарасты еншілес банктің қаржысын алаяқтықпен жымқырып, өзіне артылған сенімге қиянат жасайды. Ол өзінің қызметтік міндеттерін атқара отырып, банктегі әріптестерімен қылмыстық келісім жасап, банктің ақшалай қаржысын жымқыруға бел байлайды. Күдікті заңды түрде несие алуға мүмкіндігі жоқ тұлғалардың атынан несие алып, банктің қаржысын жымқырады. Криминалдық бизнесті дамыту үшін өзінің жұбайы және жұмыссыз танысымен қылмыстық келісім жасасқан.