Қарағанды облысында табиғи сипаттағы төтенше жағдай жарияланды.
Бұл туралы облыс әкімдігінің баспасөз қызметі хабарлады.
Баспасөз қызметінің мәліметінше, Бұқар жырау, Қарқаралы және Абай ауданының жекелеген елді-мекендерінде су тасқыны болған. Осыдан кейін бұл аудандардың әкімдері жергілікті көлемде табиғи сипаттағы төтенше жағдай жариялау туралы шешім қабылдаған.
“Қазіргі кезде 7 елді-мекенде тұрғын үйлер мен аула аумақтары су астында қалды: Сарытөбе, Чкалово, Садовое, Андрейниковка, Қызылжар, Красная Поляна, Қарамұрын. Чкалово және Садовое ауылдарында 49 және 42 баспананы су басқан. Чкаловодан 137, Садовое ауылынан 308 адам қауіпсіз жерге көшірілді. Үш елді мекенде – Қарағайлы және Қайрақты, Тұзды ауылдық округының 1-май бөлімшесінде – су басу қаупі сақталады.
Апат-құтқару жұмыстары жалғасып жатыр. Оған 1663 адам, 555 техника тартылып, Бұқар жырау, Қарқаралы, Абай, Шет және Осакаров аудандарындағы жағдай бақылауға алынған. Айта кетейік, Қарағанды облысында су тасқыны басталғалы 1453 адам қауіпсіз жерге көшірілді. 24,4 шақырымнан астам жерге үйінді жасалды, 10,5 км жуық қорғайтын бөгеттер мен дуалдар қойылып, 1264,5 шаршы метр су сорғытылды.