Өскеменде еліміздегі бірегей оқыту-сауықтыру орталығын балабақшаға айналдыру туралы шешім қабылданды.
Алайда мекеме басшылығы мен ата-аналар мұнымен келіспей отыр деп хабарлады “Хабар-24” телеарнасы.
Біріншіден, көптеген науқас бала медициналық жәрдемнен қағылса, екіншіден, қызметкерлердің жұмыссыз қалу қаупі бар.
Қордаланған мәселені Мәжіліс депутаты Азат Перуашев назарға алып, ұжыммен арнайы кездесуге келді. Үкіметке осы мәселе бойынша тағы да депутаттық сауал жолдамақ.
Азат Перуашев, ҚР Парламенті Мәжілісінің депутаты:
– Кәсіподақтың өкілі айтқандай, әкімдіктің бұйрығы реорганизацияға сәйкес келмейді екен. Сондықтан олардың қорқып отырғаны ұжымның жұмыссыз қалуы. Біз осы мәселені назарға алып отырмыз. Шынын айтсақ, осындай сирек бастамаларды сақтану керек, жабу емес, жоғары дәрежеге шығару керек деп білемін.
Лариса Клостер, орталық директоры:
– Қант диабетіне шалдыққан балаға ерекше күтім керек. Оларға балалар мүгедектігі беріледі ғой бірден. Күніне инсулин қою керек. Қантын өлшеп, тамағын дұрыс беру керек. Біздің орталықта осының бәрі қарастырылған. Мамандар да тәжірибелі. Орталықты балабақшаға айналдырса, оларға қиын болады деп қорқамын.