36 жастағы Александра Хасанованың Ақтөбедегі тұрмыстық қысым көрген әйелдерге арналған дағдарыс орталығында тұрғанына бір айдай уақыт болған. Келіншек орталық басшыларының өзін қуып жатқанын айтып, дабыл қақты.
Сөйтсе оның бұл орталықта тұруына қақысы да жоқ екен. Басында ол орталықтағыларды алдап, осында кіріп алыпты. Енді шықпай отыр, – деп хабарлады Аktobenews.kz.
«Мен осы Ақтөбе қаласынды туып өстім, Қандыағаш қаласында тұрдым. Жолдасым қайтыс болған. Баратын жерім жоқ, бір апта бойына екі баламмен вокзалда түнедім. Осы дағдарыс орталығына келгеннен мені жақтырған жоқ. Күн көрсетпейді. Балаларымда жылы киім де жоқ, мектепке ұстайтын сөмкесі жоқ. Маған жұмыс керек, мен аспазшымын. Оған қоса маған қаладан тіркеу керек. Дағдарыс орталығының қызметі ұнамайды. Енді босатыңдар деп жатыр, мен қайда барамын», — дейді Александра Хасанова.
«Онда тіркеу де, үй де бар» деген дағдарыс орталығының мамандары келіншектің өздерін тығырыққа тіреп қойғанын айтты.
«Бұл жерге тұрмыстық қысым көрген, күйеулері қорлық көрсетіп, баратын жерлері болмаған әйелдер келеді. Александраның бұл жерде тұруына еш негіз жоқ. Оның бірінші жолдасы қайтыс болған. Екінші жолдасымен ажырасып кеткеніне бірнеше жыл болған. Ал ол бізге күйеуім ұрды деп келді. Оған аяушылық танытып, баласын балабақшаға, мектепке орталастырдық. Өзі осы орталықта жатқан келіншектермен сөзге келіп қала береді», — дейді Ақтөбедегі дағдарыс орталығының директоры Гүлбадан Даут.
Басшылары айқай шығарған келіншекті дағдарыс орталығынан шығарып жібермек.