Қостанай облысында бабамыз – Кейкі батырдың бассүйегін жерлеу рәсімі өтті.
Бұл туралы Eurasian Resources Group компаниясының баспасөз қызметі хабарлады.
Көптен күткен тарихи рәсім 15-қыркүйекте сағат 11.00-де батырдың туған жері – Арқалық қаласы Амангелді ауданы Тасты ауылында өтті. Оған ҚР мемлекеттік хатшысы Гүлшара Әбдіқалықова, Парламент депутаттары, мемлекеттік органдардың басшылары, қоғам қайраткерлері, белгілі ғалымдар, тарихшылар, шығармашылық және ғылым саласы зиялылары қатысты.
Еске салайық, биыл 12-тамызда Қазақстанның бұрынғы премьер-министрі Кәрім Мәсімов РФ Үкімет төрағасы Дмитрий Медведевпен кездесуі барысында өткен жүз жылдықтағы ұлт-азаттық қозғалыстың көшбасшысы Кейкі батырдың мүрдесін елге қайтару туралы мәселені көтерген еді. Дмитрий Медведев бұл мәселені анықтап, шешу үшін қажетті тапсырмалар беретінін айтты.
“Мен ауызша және егер қажет болса, жазбаша тапсырма беріп, бұл мәселенің анық-қанығын анықтайтын боламын”, – деп жауап берді Медведев Мәсімовтің ұлт көсемдерінің мүрделерін көму үшін Қазақстанға қайтару туралы өтінішіне.