Шымкентте 21 қаңтар күні таңертең алты айлық ұлы Марселмен бірге үйінен шығып кеткен Камила (Шын есімі Хуршидабону) Мулажанова есімді 18 жастағы келіншек қайтып үйіне бармаған деп хабарлайды NUR.KZ.
Камиланың жұбайы мен туыстарының NUR.KZ тілшісіне берген мәлімдемесіне сүйенсек, 21 қаңтар күні таңертең келіншек алты айлық сәбиімен бірге “Рахат” дүкенінің маңындағы медицина орталығына қан тапсыруға кетеді. Үйден шығарда ешкіммен сөзге келмеген, күйеуімен ренжіспеген, көңіл-күйі де бірқалыпты болған.
Келіншектің Шымкентте жақын туысқандары жоқ. Оның анасы Самарада тұрады. Поездпен кетіп қалуы мүмкін деген оймен темір жол вокзалына іздеп барғанда, оның атына билет алынбағаны анықталған. Іздестіру жұмыстары әзірге еш нәтиже бермеді. Жоғалып кеткен келіншектің жұбайы Руслан Абдюшев полицияға арыз жазған. Кез-келген ақпараттың маңызды екенін айтып, оны көргенде болса бірден хабар беруін сұрап отыр. Әлеуметтік желілерде еріктілер мен желі қолданушыларына «Егер сіздер кішкентай баласы бар қызды көрген болсаңыздар, өтініш, +7 701 875 8787 нөмірі бойынша хабарласыңыздар» деген мәтінмен хабарлама таратылуда.