Шымкентте сот үкімімен келіспеген ана 4 баласын облыстық соттың алдына тастап кетпек. Сот балаларын жетімдер үйіне өткізуге кеңес берді.
ОҚО Сарыағаш ауданының 32 жастағы тұрғыны Нағима Абдиева бүгін кішкентай төрт баласын алып, облыстық соттың алдына келді. Оның айтуынша, сот оның күйеуін 10 жылға жазықсыз қамаған. Асыраушыдан айырған сот енді балаларын асырасын, дейді төрт баланың анасы.
Қалалық соттың үкімімен Талғат Абдиев топ болып қыз зорлаған деген айыппен сотталған. Алайда оның жұбайы соттың мүлдем әділ өтпегенін айтады.
Сөзіне сенсек, өткен жылы оның күйеуі қала базарларының біріне көкөніс өткізу үшін келеді. Кейін топ болып қыз зорлаған, деп айып тағылып, қамауға алынады. Онымен бірге болған екі танысы сотта айыптарын толық мойындап, Талғаттың бұл қылмысқа қатысы жоқтығын мәлімдепті. Қылмыс орын алған кезде, кәмелет жасқа толмаған қызды жазғырғандар жазаларын алған.
– Сотта әділдік жоқ. Күйеуім өткен жылы сәбіз өткізу үшін қалаға кеткен. Сол түні заправкаға қонып, ертеңіне келді. Екі танысымен бір пәтерге барғанын айтқан. Сөйтсем, ол екеуі бір қызды зорлапты. Ол қыз сотта әртүрлі жауап берген. Мас болып, не болғанын білмегенін айтқан. Сараптамадан өттік күйеуіммен бірге. Одан қызда бар бірнеше инфекцияның біреуін анықтапты. Мен таза шықтым.
Қыз асырап отырмыз, егер ол ондай жауыз болса, мен өзім-ақ тастап кетер едім. Ол өте момын, ешкімге тіл тигізбейтін еді,
дейді Нағима Абдиева.
Сот алдында тұрып, ОҚО сотының баспасөз-хатшысы Қабыл Дүйсенбиге хабарласқанымызда, ол дөрекілік танытып, олардың жөнімен кетуін айтты. Телефон арқылы, «Сізге өзі не керек?», деп өзімізге бас салды.
Балаларын сот алдында қалдырып кетпек болған ананың әрекетінен кейін ғана, облыстық соттың қызметкерлері бой көрсетті. Сот алқасының төрағасы Пірнияз Зиядинхан, тілшіге қарай ашулық танытып, аса дөрекілікпен жақ ашпауын бұйырды. Жақ ашпадық. Пірнияз Зиядинхан мырза, Нағима Абдиеваның уәжін тыңдап, балаларын жетімдер үйіне өткізуге ақыл айтты.
– Сот бала асыраумен айналыспайды. Оларды тастап кетсеңіз, милиция шақырамыз. Милиция мемлекет қарауына өткізеді, – деді ОҚО сот алқасының төрағасы Пірнияз Зиядинхан.
Пірнияз Зиядинхан көпбалалы анаға аппеляциялық арыз жазуға болатынын ескертті. Күйеуі ақ болса ақталып, босатылатынын айтты. Алайда Нағима Абдиева соттың сөзіне мүлдем сенбейді.
– Бұлар сіз болған соң ғана қабылдап тұр ғой. Әйтпесе, адам құрлы көрмейді. Көрдіңіз ғой айтқан ақылын. Жетімдер үйіне таста, дейді. Қарға қарғаның көзін шұқымайды. Олар қайта қараса да, үкім бұзылады деп сенбеймін.
Көрдім, соттың қандай екенін. Біржақты. Бәрін ақша шешеді сотта. Көзім жетті.
Енді жаңа-жыл дейді, әрі қарай демалыс дейді, созады ғой солай. Ақиқатын анықтауға ешкімнің де бас ауыртпайтынын білдім, – дейді Нағима Абдиева.
Ашынған әйел жақын күндері аппеляциялық шағым өткізбек. Облыстық соттан да әділдік таппасам, жоғарғы сотқа дейін барамын, – деп бекініп отыр. Үкім өзгерісіз қалса, төрт баласын Астанадағы Жоғарғы сот ғимаратының алдына тастап кетпек.