Ақтөбе облысында автокөлікті қолмен тоқтатқан жол полициясы қызметкері жауапқа тартылды.
Бұл туралы ҚР Ішкі істер министрлігі әкімшілік полициясы комитетінен хабарлады.
Айта кетелік, әлеуметтік желіде көлікті қолымен тоқтатқан жол полициясының видеосы пайда болған болатын.
„Жаңа жылдың алғашқы күндері әлеуметтік желіде полиция қызметкері көлікті қолын бұлғап тоқтатқан видео пайда болған еді. Анықталғандай, ол Ақтөбе облыстық ішкі істер департаментінің жергілікті полиция қызметінің қызметкері болып шықты. Олар бұйрықты бұзғаны үшін тәртіптік жазаға тартылды„ деп хабарлады ҚР Ішкі істер министрлігі әкімшілік полициясы комитетінің баспасөз хатшысы Ирина Лукьянина.
Баспасөз қызметіндегілер жол полициясы қандай жағдайда көлікті қол бұлғап тоқтатуына рұқсат берілетін айтып берді.
„Егер жол-көлік оқиғасы орын алса, кептеліс болса немесе төтенше жағдайда және жол-потрульдік полициясы бекеттерінде шұғыл іздестіру шаралары жүргізіліп жатқанда қол бұлғап тоқтатуға болады. Мысалы, көлікті ұрлап айдап кетсе немесе қылмыс орын алып, бір көлікті ұстау керек болса, сол кезде қол бұлғап тоқтатуға болады. Мысалы, біз „Рубеж„ бекеттерінде қол бұлғап тоқтатуға рұқсатты қалдырдық. Кейбір өңірлерде оған рұқсат етілмеген, мәселен Ақтөбе облысында„ – дейді Лукьянина.
Еске сала кетелік, жаяу полиция кезекшілеріне 2017 жылдың 1-қаңтарынан бастап көліктерді тоқтатуға тыйым салынған. Полиция толықтай автопатрульге көшкен. Ала таяқ алынып тасталды.