Енді Ақтөбеде: Оқушы қыз беті ашық жатқан кәріз құдығына түсіп кетті

«Оқушы құдыққа түсіп кеткен кезде жанындағы балалар көріп, адамдарды көмекке шақырған. Сол кезде құрылысшылар көмекке келіп, алып шықты. Жәдел жәрдем де шақырылды.

4 сынып оқушысының денсаулығына еш зақым келмеді, сабағын оқып жүр. Негізі мектеп ұжымы апта сайын сенбілікке шығып, ашық тұрған құдық анықталса, Ақтөбе қаласы, Астана ауданының әкімдігіне суретін жібереді.

Бұл жағдай мектеп аумағынан тыс жерде болды. Сынып жетекшісі құдыққа түсіп кеткенін естіген бойда барып, жағдайы жақсы болған соң үйіне апарды», – деді М.Дулатов атындағы орта мектеп-лицейінің директоры Дәмелі Қартпағамбетова.

Ата-анасы құдықтың дәл қасындағы жедел жәрдемге барып, баласын қаратып алды. Оқушы өзін жайсыз сезінбегенін, жарақаты жоқ екенін айтып берген.

«Қызым дін аман. Ешкімге шағым жасап, арыз жазбадым. Бірақ қалалық тұрғын үй-коммуналдық шаруашылығы бөліміне телефон шалып, ескерту бердім. Мемлекеттік мекеме «біздің балансымызда жоқ, «Ақтөбе Сәулет» компаниясы жауапты» деп айтты. Аман-сау болған соң шүкір етіп отырмын. Сол күні қызымды құдықтан арқанмен тартып, шығарып алған адамдарға алғыс айтамын», – деді оқушының анасы Айсұлу Қойлыбаева. Бір айта кететіні, құдықтың қақпағы жоқ, тек ағашпен жабулы тұр.

Еске салайық, осыған дейін Астанада 14 жасар оқушы қыз кәріз құдығына құлап, қаза тапқан болатын.

Дәл сол құдыққа келесі күні тағы бір бала құлап жазым бола жаздады. Оны сол маңдағы куәгерлер құтқарып алған. Ал, қайтыс болған қыздың денесін құтқарушылар тек келесі күні ғана таба алды.