Әлеуметтік зерттеуге сүйенсек, елімізде дінге сенетіндер 87 пайызды құрайды.
Бүгін ОКҚ-де өткен баспасөз мәслихатында дін істері және азаматтық қоғам вице-министрі Берік Арын діни қызмет туралы заң жобасына атеистердің құқығын қорғау нормасы енгізілгенін мәлімдеді, -деп хабарлайды Sputnik Қазақстан тілшісі.
“БҰҰ адам құқықтары жөніндегі комитеті заңда дінге сенбеушілердің құқығы қорғалмағанына қатысты ескертулер жасады.
Бұл жерде біз дінге сенбеушілер немесе діннің талаптарын толығымен орындамайтындардың құқығын айтып отырмыз. Бізде тек дінге сенушілердің ғана құқығын қорғау туралы, тек солардың сезімдерін қорлауға жол берілмейтіні айтылған.
Енді біз дінге сенушілер ғана емес, дін талаптарын толығымен орындамайтындардың да құқығын қорғап отырмыз”, — деді Арын.
“Әлеуметтік зерттеу жүргізген кезде азаматтардың 87 пайызға жуығы дінге сенетіндерін айтты. Алайда сол 87 пайыздың ішінде тек 16 пайызы ғана бүкіл діни жоралғыларды орындайды. Қалғандары дінге сенеміз дегенмен, діни рәсімдерді орындамайды”, — дейді ол.
Айта кетсек, заң жобасы аясында 12 заң актісіне шамамен 50-ге жуық түзету мен толықтыру енгізілмек. Арын барлық түзетуді үш бөлімге жіктеп көрсетті.
Бірінші бөлім дінді деструктивті мақсаттарда пайдалануға жол бермеуге бағытталса, екінші бөлімде мемлекеттік органдардың қызметін реттеуге қатысты нормалар қарастырылған. Ал үшінші бөлімде діни бірлестіктердің жұмысын жеңіл әрі түсінікті етіп жасауға арналған түзетулер енгізілген.