Өзін масқаралаған видеоға байланысты жыл соңында депутаттық мандатынан айырылған Мұхтар Тінікеев қайырымды іс акциясына қатысатынын мәлімдеді.
Экс-депутат Мұхтар Тінікеев аязда жақсы іс қылу акциясына қолдау білдірді.
“Астана әкімінің бастамасын қолдаймын. 1 сағаттан соң Қарағандыға бет алмақпын. Күн суық, ол жаққа барамын деген адамды тегін ала кетемін. Жолға шығатын уақытым – сағат 11:00”, – деп жазды бүгін Тінікеев Facebook-тегі жеке парақшасында.
Ал әлеуметтік желілерде тарап кеткен видеода Мұхтар Тінікеев арақ ішіп, стақандасына қоқан-лоқы көрсетеді. Кейіннен депутат осы жайтқа байланысты өз еркімен жұмысынан бас тартады. Саясаттанушылар Тінікеевтің бұл әрекетіне жақсы баға берген болатын. Өйткені Қазақстан саясатында мұндай жайт ілуде бір кездеседі. Көбіне бізде масқара болған саясаткер оқиғаның абыр-сабыры басылғанша көпке төбесін көрсетпейді немесе қарсы шабуылға шығып, кінәліні іздейді.