“Екі жыл зәремізді алды”. Арыста өте қауіпті қылмыскерге үкім шықты

Оңтүстік Қазақстанда өте қауіпті қылмыскер деп танылған кісі өлтіруші 20 жылға сотталды.

Соңғы құрбаны оны танып, осылай қаскөй қолға түскен

деп хабарлады Timeskz.

Өткен жылы сәуір айында Арыста елді шулатқан оқиға орын алды. Жалғыз тұратын зейнеткерді өз үйінде аяуандық өлтіріп кеткен. Қылмысын жасыру үшін үйге бензин шашып өртеген. Алайда өрт қарт ананың халатына ғана тиген. Оқиға орнына келген тергеушілер барлық айғақты алған, соның ішінде марқұмның тырнағының астындағы іздерді де. Алайда тергеу өз нәтижесін бере қоймады.

Арада 4 ай өткен соң тағы бір жалғызбасты зейнеткерге шабуыл жасалады.

Бірақ, бақытқа орай, ол дін аман қалыпты. Кіре беріс есіктің терезесінен кірген қаскөй ары қарай бөлмелерге өте алмаған. Өйткені әжей есікті іштен мықтып бекітіп алыпты. Сондықтан ол кіре беріс дәлізде қарияның шыққанын күткен. Таңертең есікті ашып шыққанда әжейдің басына шүберек лақтырып, онымен қылқындыра бастайды. “Ақша қайда?” – дейді ол. Әбден шошынған әжей тығып қойған 700 мың теңгесін алып шыққан. Ақшаны алған ол тайып тұрған. Әжей ұрының бетін көрмесе де кекеш дауысын есіне сақтап қалыпты. Есін жиған соң ол бірден полиция бөлімшесіне тартқан.

Ал биыл қаңтар айында Арыс қаласында жалғызбасты қос қарияға шабуыл жасалды.

Олар  қызының екіқабатты үйінің жанында төрт бөлмелі үйде тұрған. Әдеттегідей, таңертең қызы әке-шешесіне бас сұғып, бірге шай ішеді. Кетер кезінде шешесі күйеубаласы келіп, жертөледен бір қап картопты шығарып беруді өтінген. Кемпір есік алдына шығып кеткенде үйге біреу кіріп келеді. Бірден ақша сұраған адамға аңырып тұрғанда шалдың мойнына арқан салынады. Оны қылқындырып, тепкілей бастайды. Сол кезден сырттан кемпірі кіріп, еденде қан-жоса боп жатқан шалын көріп шошып кетеді. Қаскөй енді әжейге тап береді. Ол 50 мың теңгені алып шығып, бұдан басқа ақшасы жоғын айтады. Бұған сенбеген жігіт кемпірді бетінен қатты ұрып жібереді. Ол құлап, талып қалады.

Екеуін де сілейтіп салдым деп ойлаған жігіт кетерде газды ашып кетеді. Бірақ, бақытқа орай, ол күні жер үйлерге берілетін газ тоқтап тұрыпты.

Аз уақыттан соң күйеубала жетеді. Екі жақта сұлап жатқан қайын атасы мен апасын көрген ол бірден жедел жәрдемге телефон соғады.

Ауруханаға тергеуші келгенде қос қария ұрыны танитындарын айтқан.

Ол сол кісілер тұратын көшедегі бір адамның баласы болып шықты. 19 жасында ол кісі тонағаны үшін 5 жылға сотталыпты.