Суы қатқан көлде үсіп өле жаздаған киелі құсты жігіттер тура жұмыстарына әкелуге мәжбүр болған. Себебі қызыл кітапқа енген қанаттыны өткізетін жер таппай қиналыпты. Үйірінен адасып жалғыз қалған жаралы аққуды құтқару операциясына тілшіміз Ербол Сейілхан да араласып, уақытша пана тауып берді.
Бұл туралы КТК хабарлайды.
Ерлан Әбдірахманов:
-Тамақ салып қойғанбыз. Жарты бөлке нан езіп. Міне, жеп жатыр. Аққудың сыңары болады ғой. Жалғыз өзі. Жас аққу ғой бұл.
Жұмысшылар жаралы құсқа «Құралай» деп ат қойып үлгерген. Барлығы Құралайды айналшықтап шықпай жүр. Бірақ сыңарынан айырылған жалғыз аққу құтқарылғанымен оны апаратын Астанада бірде-бір орын болмай шықты. Тек Елордадан әзер дегенде бір жанашыр табылып, аққуды алып кетті.
«Бақ» деген аты болмаса бұл кәдімгі үй. Негізінен бұнда ит-мысық, қояндар ғана тұрады. Енді аққуға солармен бірге мекендеуге тура келеді. Әзірге «Құралайға» бөлек орын дайындалғанша, осы бөлмені паналай тұрмақ.
Халқымыз киелі санайтын құс төресі енді көктемге дейін осында болады. Жарақаты жазылып күн жылынған соң өз үйіріне жіберілмек. Ал жағдайын жасап асыраймын деушілерге аққуды бағуға беруге дайын. Бір қызығы, небір атақты құрылыстарымен танымал Астанада мемлекеттік бақ жоқ. Сондықтан жыл сайын үйірінен адасқан қанаттыларға пана табу оңай емес.