Денсаулық сақтау министрлігі COVID-19 жұқтырған адамдар санының не себепті күрт артқанын түсіндірді

— Соңғы екі-үш күнде бұрынғыға қарағанда коронавирус жұқтырғандардың саны артқаны анықталды. ТЖ режимі тоқтатылды, бірақ карантиндік шектеулер сақталып тұр, (…) Індет жұқтырғандардың саны артып жатқандықтан, карантин шектеулерін бәсеңдету мерзімі бір аптаға шегерілді, — деді шенеунік.

Бюрабекова көрсеткіштің артуын халықты скринингтен өткізу қарқынының артуымен байланыстырды.

— Бүгінгі күні зертханалардың қуаты тәулігіне 28 мың тестке дейін артты. Тауарлар мен қызметтердің сапасын бақылау комитеттерінің, ЖИТС орталықтарының зертханалары, жеке зертханалар, сондай-ақ инфекциялық стационарлардың зертханалары тартылды. Бұдан басқа, эпидемиологиялық жағдайға байланысты өңірден аймаққа жолданған жылжымалы зертханалар да бар, — деп түсіндірді вице-министр.

Оның айтуынша,  14 сәуір күні бекітілген тестілеу жоспары аяқталуға жақын. Жақын арада Денсаулық сақтау министрлігі скринингтің жаңа қадағалау механизміне  көшеді.

— Мәселен, науқастарды тестілеуден өткізетін емханалар тағайындалады. Ары қарай  ел бойынша ауру жұқтыру қарқынының өсуі анықталады, — деп түйіндеді Бюрабекова.