Денсаулық министрлігі майдың құрамында қауіпті зат бар екенін хабарлады
Биылдан бастап Қазақстанда дүкен сөрелеріне түскен май өнімдерінде құрамындағы трансмайлар туралы ақпарат болуы қажет.
Бұл туралы ҚР Денсаулық сақтау министрлігі таратқан ескертпе хабарламада айтылады.
Сөйтсек биылдан бастап май өнімдеріне қатысты жаңа нормалар күшіне енді.
«Енді маргариндер, өсімдік-сары май және өсімдік-май спредтерінің, қорытылған өсімдік-сары май және арнайы мақсаттағы майлар, оның ішінде аспаздық, кондитерлік, нан пісіру, сүт майын алмастырғыштар және құрамында трансмайлар бар басқа да өнімдердің қаптамасында қаныққан май қышқылдары мен май қышқылдары трансизомерлері туралы қосымша ақпарат берілуі тиіс (өнімдегі май құрамының пайызымен)», – делінген ҚР ДСМ Қоғамдық денсаулықты сақтау комитетінің ресми хабарламасында.
Дүниежүзілік денсаулық сақтау ұйымы трансмайларды тұтыну жүрек-қан тамыры ауруларына, абдоминалды семіздікке, диабетке, Альцгеймер ауруына, өкпе обырына, репродуктивтік функциялардың бұзылуына, өт-тас ауруларына алып келетінін ескертеді.
Трансмайлар қайта өңделген тамақ өнімдерінде, маргариндер және бутерброд қоспаларында, қуырылған тағамда, фастфуд және пісірілген нанда, сондай-ақ пиццалар, чипсілер, печеньелер, фри картобы, тауық етінен нагетстер және басқа да өнімдерде болады.
Бүгінде көптеген елдерде трансмайларды пайдалануға тыйым салынған. Мәселен, Швейцария, Австрия, Исландия, Венгрия, Норвегия, Швеция, Данияда өнеркәсіптік трансмайлар құрамының жоғарғы шегін 100 грамм майға 2 грамм, яғни жиынтық майдың 2 проценті деңгейінде белгіленген.
Биылдан бастап ондай көрсеткіш Қазақстанда, сондай-ақ Еуразиялық экономикалық одаққа мүше мемлекеттерде де белгіленді.
«2018 жылдың 1-қаңтарынан кейін дайындалған, таңбалауында май қышқылдары трансизомерлерінің құрамы туралы ақпараты жоқ немесе олардың үлесі белгіленген нормативтен (2 пайыздан) асатын өнімді сатып алған жағдайда тұтынушы Қоғамдық денсаулық сақтау комитетінің аумақтық органына жүгіне алады. Техникалық регламенттер талаптарын бұзғаны, соның ішінде сәйкес келмейтін өнімді шығарғаны үшін кәсіпкерлік субъектілеріне 40-тан 200-ге дейін айлық есептік көрсеткіш көлемінде айыппұл салу көзделген», – делінген комитеттің ресми хабарламасында.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе