Бұрынғы білім және ғылым вице-министрі 7 жылға сотталды
Білім және ғылым экс-вице-министрі Саят Шаяхметов 7 жылға бас бостандығынан айырылды, сондай-ақ, оның мүлкі тәркіленді.
Бұл туралы сот залынан Tengrinews.kz хабарлады.
Астананың Алматы аудандық №2 соты Білім және ғылым министрлігінің бұрынғы вице-министріне қатысты істі аяқтады.
“Сот Шаяхметов Саят Болатұлына ҚР Қылмыстық кодексінің 176-бабы, 4-бөлігі, б тармағына сәйкес, қылмыс жасағаны үшін айыпты деп танып, 7 жылға бас бостандығынан айыру жазасын тағайындады. Мүлкі тәркіленіп, 5 жылға дейін мемлекеттік қызметте жұмыс істеу құқығынан айырылсын. Жазасын орташа қауіпсіз қылмыстық-атқару жүйесі мекемесінде өтесін”, – деп оқыды үкімді судья Құлбаева.
Саят Шаяхметов 4 жыл бойы тергеуде болған еді.
Сонда енді 3 жылы қалды. Оған қатысты іс 2014 жылдың жазында басталған болатын. Сол жылдың қазан айында білім және ғылым министрлігінің бұрынғы вице-министріне қатысты іс қайта тергеуге жіберілді. 2013 жылдың 29 сәуірінде қаржы полициясы Өскеменде 700 орындық білім беру мекемесі құрылысы кезінде бюджеттің бір миллиард теңгеден астам қаражатын иемдену және талан-таражға салу дерегі бойынша қылмыстық іс қозғаған болатын. Күдік бойынша Білім және ғылым вице-министрі Саят Шаяхметов пен “ҚР салынып жатқан білім және ғылым нысандары дирекциясы” ЖШС бас директоры Пак ұсталды. Сол жылдың 17 мамырында Шаяхметов соттың санкциясымен үй қамауына алынып, екінші фигурант тұтқындалды.
Сонымен қатар, тағы екі адам сотталушылар қатарына қосылған болатын: “ЗАК Сервис” ЖШС қызметкерлері Роман Киреев пен Алексей Тутубалин. Шаяхметов вице-министр қызметіне 2011 жылдың қазан айында тағайындалған болатын. Өзіне қатысты қылмыстық іс қозғалған кезде, нақты айтқанда, 2013 жылдың 8 мамырында ол өзге жұмысқа ауысуына байланысты қызметінен босатылған еді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе