Бішкек қала кенешінің депутаттары Қырғызстандағы Қытай елшілігін 3,371 гектар жер үшін аренда төлеуден босататын қаулыны қолдап шықты, деп хабарлайды депутат Канатбек Музуралиевтің ақпаратына сүйенген sputnik.kg.
Қазір ол жерде ҚХР-дің дипломатиялық өкілдігі орналасып алған.
Бір қызығы,
30 мамыр күні Бішкек қала кенешінің депутаттары бұл идеяны қолдамай, екі рет дауыс беру кезінде қарсы шыққан.
Содан бейсенбі күні қала мэриясына сыртқы істер министрі Эрлан Абдылдаев келген болатын, бірақ ол мұнда не үшін келгенін журналистерге түсіндіруден бас тартқан.
Дауыс беру кезінде 45 депутаттың 24-і Қытай елшілігін аренда төлеуден босатуды қолдап шықты.
Музуралиев хабарлағандай, Сыртқы істер министрлігіне қарасты “Кыргыздипсервис” кәсіпорнының қызметкері қала кеңесінің отырысында ақпаратты өзгеріп беріпті.
“Кыргыздипсервис” маманы ұсынған қағаздарда, “тегін” деген сөз болған. Соны көрген депутаттар Қытайға тегін жер беруге болмайды деп өре түрегелді. Бүгін сыртқы істер министрі келіп, бәрін түсіндірді. Қытай бізге Пекиннен 25 сотық жер береді екен, ол жерге алты қабатты тұрғын үй кешені салынып, оның жанынан үш қабатты елшілік ғимараты салынады дейді. Жобаның құны 9 миллион доллар“,
— деді Музуралиев.
Депутаттың айтуынша, 2003 жылы Қырғызстан Қытайға 49 жылға арендаға жер берген. Ал елшілік жыл сайын 700 мың сом төлеп келген. Музуралиевтің сөзінше, Қырғызстанның Қытайдағы елшілігі одан әлдейқайда көп ақша төлеген.
“Енді екі тарап та арендалық төлемнен босатылды“, — деп қосты ол.
Айта кетсек, маусым айының басында Қырғыз президенті Сооронбай Жиэнбеков Қытайға ресми сапармен барады деп күтілуде.
Фото: © REUTERS / Vladimir Pirogov