Басы даудан арылмаған сала. «Қазақстан темір жолы» – 3 трлн теңге қарыз

«Қазақстан темір жолы» дефолттың алдында тұр. Ұлттық компанияның қарызы 3 трлн теңгеге жақындаған. Оны өздігінен өтейтін шамасы жоқ. Соңғы төрт жылда темір жол саласына 2 трлн теңге құйылған. Оның 332 млрд теңгесі бюджет ақшасы. Қомақты сома салынғанына қарамастан, салада проблема шаш етектен. Теміржол желілері, локомотивтер, вагондардың әбден тозығы жеткен. Вокзалдар жөндеу көрмегелі қай заман. Жоғары аудиторлық палата төрағасы Қазақстан темір жолы «әрең күн көріп отыр» дейді.

«Бүгінде «Қазақстан темір жолы» міндеттемелерін толық төлеуге қабілеті жоқ және несие тәуекелінің «қызыл» аймағында тұр. Борышы 2024 жылдың басында 2,9 трлн теңге болды. Әлі де өсіп жатыр. Жалпы борыштың 45 пайызы, яғни 1,3 трлн теңгесі бұрын алынған борыш міндеттемелерін қайта қаржыландыруға бағытталған», – деді Жоғары аудиторлық палата төрағасы Әлихан Смайылов.

2 трлн 9 миллиард теңге қарыз қайдан шықты? «Қазақстан темір жолы» ҰК басқарма төрағасының орынбасары Қанат Әлмағамбетовтың айтуынша, вагондар, локомотивтер, жүк вагондарын, жолаушылар таситын вагондар алған. Жол салып жатыр. «ҚТЖ» бір қарызын екінші қарызбен жапқан.