Ақтөбеде болған Бас мүфти Ерлан қажы Малғажыұлы су тасқыны кезінде баспанасынан айырылған Сағыныш Тобажановаға екі бөлмелі пәтердің кілтін табыс етті.
Бұл туралы ҚазАқпарат хабарлады. Ақтөбедегі тасқын кезінде 800-ден астам үйді су басып, 86 үй қирап қалғанын еске сала кетелік. Баспанасы құлаған 65 адамға жер телімі беріліп, құрылыс жұмыстары үшін әрқайсысына 1 миллион теңгеден бөлінді. Кейін «Нектар» құрылыс компаниясы өзінің екі жұмысшысына пәтер сыйлады. Ал енді Ақтөбеге арнайы ат басын тіреген Бас мүфти 2 бөлмелі пәтердің кілтін ІІ-топ мүгедегі Сағыныш Тобажановаға табыс етті.
Пәтер Маңғыстау, Оңтүстік, Батыс Қазақстан, Атырау, Қызылорда, Қостанай және Ақтөбе облыстарындағы мешіттер жинаған ақшаға сатып алыныпты. Пәтердің құны 7,5 миллион теңгеге түскен. Оған қоса баспана жиһазбен, тұрмыстық техникамен жабдықталыпты.
«Су апаты – табиғи апат. Сондай қиын кезде еліміздің жеті облысындағы жамағат өз көмегін беруге ұсыныс айтты. Мешіт жамағаттары қаржы жинап, жақсы іс атқарды. Тыныштық, береке берсін! Біз егемендігіміздің, Елбасының салиқалы саясатының арқасында бақытты кезеңге жеттік. Қадірін білу керек. Ең қастерлісі – тәуелсіздігіміз. Қалай бағалаймыз десек, бірлігімізбен, тыныштығымызбен деп айтар едім», – деді Ерлан Малғажыұлы.
«Нұр Ақтөбе» ықшам ауданындағы 2 бөлмелі пәтер бұйырған Сағыныш Тобажанова өзі жалғыз емес, ол қарт анасы мен екі інісіне де қамқор екен. Олар бұған дейін Махамбетовка ауылында тұрған.
Су тасқыны кезінде үш бөлмелі баспанасы қирап, шатыры ортасына түскен. Олар бұған дейін пәтердің, жердің кезегіне тұрып, мемлекеттен көмек сұрамапты.
«Барлығына алғыс айтамыз. Суға кеткен күннен бастап бізге көмектесіп, жағдайымызды біліп тұрды. Адам екі жағдайда көзіне жас алады. Бірі қайғыда, екіншісі қуанышта. Бүгін мен қуаныштан жылап отырмын», – деді Сағыныш Тобажанованың анасы Бағила Сәрсенғалиева.