Ақ үй хатшысы Шон Спайсер Иранның Жоғарғы көшбасшысы аятолла Хаменейдің АҚШ басшылығы туралы мәлімдемесіне жауап берді.
“АҚШ-қа жаңа президент келгенін ескермеген Иран өзін өзі алдап жүр деп есептеймін”, – деді Спайсер сейсенбі күнгі брифингте. Оның айтуынша, Құрама Штаттардың жаңа басшылығы Иранның қоқан-лоқыларына бейжай қарай алмайды, оларға міндетті түрде жауап береді.
Бұған дейін Иранның Жоғарғы көшбасшысы аятолла Сейед Әли Хаменеи ирандық әскери қолбасшылар алдында баяндама жасап, тұтас бір ұлтқа шектеу енгізген АҚШ өзінің шынайы келбетін көрсетті деп мәлемдеді. “Трамп өз әрекетімен АҚШ-тың басқару жүйесі саяси, экономикалық, әлеуметтік және моральдық жемқорлыққа батқанын растады”, – деп мәлімдеді Иранның аятолласы.
Дональд Трамп билікке келгелі бері АҚШ Иранға бірқатар санкция енгізді, олар Иранға америкалық сыртқы саяси қысымды күшейтеді деп бағаланды. Ақпан айының басында Вашингтон Тегеранға баллистикалық зымырандарын сынақтан өткізуге болмайтынын ескерткен еді.