Қазақстанда әншілердің ұятсыз клиптерін тексеретін «Ұлттық көркемдік кеңес» керек. Өйткені экранда аймаласып-сүйісіп, төсі мен санын жарқыратып, жартылай жалаңаш денесін көрсететін әншілер өскелең ұрпақтың санасын бұзады. Мұндай пікірін журналист Берік Сұлтан өзінің facebook-тегі парақшасында жария етті.
«Бізге әншілердің бейнебаянын тексеретін «Ұлттық көркемдік кеңес» керек. Олар сараламаған бейнебаян телеарнадан көрсетіліп, әлеуметтік желіге жүктелмеу керек. Ол көркемдік кеңесте бейнебаян сапасына, мағынасына және ең бастысы ұлттық талаптарға сай екенін тексеретін маман болуы шарт. Сапасы мен мағынасын тексеру түсінікті шығар. Ұлттық талапқа сай
бейнебаянда біреудің әйеліне ғашық болу, сол қатынға арнап өлең айту, бала күнгі ғашығын балалы-шағалы болғанда көріп қалып, махаббаты қайта оянып кету, аймаласу, сүйісу, төсі мен кіндігі көрінетін көйлек, санды жалтыратқан юбка, тырысқан шалбар болмауы керек.
Егер осылардың біреуі бейнебаяннан байқалса, оны ұлт болашағына бей-жай қарамайтын «Ұлттық көркемдік кеңес» жарамсыз етіп, қатаң ескерту беру керек.
Неге дейсіз бе? Қазір балаларды телеарна тәрбиелеп отырғанын жақсы білесіздер. Сол телеарна олардың киім кию үлгісін таңдап, ненің сән ненің ескілік екенін айқындап беріп отыр. Бұл өкінішті және өте қауіпті.
Ертең қызыңыз бейнебаяннан көріп қасыңызда қысқа шортимен жүрмеуіне, төстартқышының түсі көрінетін көйлек кимеуіне, кіндігіне сырға тағып, шашын көк-қызыл қылып боямауына кім кепіл?!
Ешкім жамандықтан сақтандырылмаған. Көшеде туып, қоқысқа баласын тастаған қыздың да ата-анасы қызын жаман болады деп ойлаған жоқ. Ол көргенін істеді. Сөйтіп, нәтижесінде зинадан бала туылды. Ұрпақ тәрбиесін жақсартудың ең негізгі тетіктерінің бірі бейнебаяндарды сүзгіден өткізу!», делінеді журналистің жазбасында.