Ауыл халқының 80,3 пайызы ауыз сумен қамтылған – АШМ
Ауыл халқының 80,3 пайызы немесе 6,2 млн адам ауыз сумен қамтылған. Бұл туралы ҚР Ауыл шаруашылығы министрi Асқар Мырзахметов «Елдi мекендердi сапалы ауыз сумен қамтамасыз ету» тақырыбындағы парламенттiк тыңдауда айтты, деп хабарлайды Baq.kz тiлшiсi.
«Халықты ауыз сумен қамтамасыз ету мәселесі аса маңызды. Сондықтан, бұл тақырып Үкіметтің, жергілікті биліктің күн тәртібінен түскен емес. 2002 жылы «Ауыз су» бағдарламасы қабылданып, 2010 жылға дейін жүзеге асты. Нәтижесінде 3 417 ауылды елді мекендi немесе 3,9 млн халықты ауыз сумен қамтамасыз етуге жағдай жасалды. Тасымалды суды пайдаланатын тұрғындардың саны 445 мың адамнан 123 мың адамға немесе 3,5 есеге азайды. 2011 жылы «Ақ бұлақ» бағдарламасы қабылданды, ал 2015 жылдан бастап «2020 жылға дейін өңірлерді дамыту» бағдарламасының шеңберінде «Ауыз су» жобасы іске асырылып жатыр», – дедi Мырзахметов.
Атап өтсек, «Су кодексіне» сәйкес, Ауыл шаруашылығы министрлігі елді мекендерге дейін топтық су құбырларын салып, жаңартады, ал Инвестициялар және даму министрлігі елді мекендердің ішіндегi желілерге жауап бередi.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе