Ауғанстаннан Қазақстан арқылы Еуропалық елдерге адамдарды заңсыз тасыған 5 күдікті сотталды
Атырауда Ауғанстаннан Еуропа елдеріне азаматтарды заңсыз тасымалдаған трансұлттық ұйымдасқан топтың бес мүшесі сотталды.
Бұл туралы Атырау облысының қылмыстық істер жөніндегі мамандандырылған ауданаралық сотының баспасөз қызметі хабарлады.
“Атырау облысының қылмыстық істер жөніндегі мамандандырылған ауданаралық соты заңсыз көші-қон жолын ұйымдастырған Қазақстан мен Ресейдің 5 азаматына қатысты қылмыстық істі қарады. Олар 2015 жылдың қазанынан 2016 жылдың наурыз айы аралығында Ауғанстан Ислам Республикасының азаматтарын транзитпен Қазақстан, әрі қарай, Мурманск облысындағы “Солтүстік маршрут” деп аталатын Ресей-Финляндия шекарасы арқылы Ресей және Европалық Одақ елдеріне жеткізіп отырған”, — делінген хабарламада.
Сот үкімімен төрт сотталушы Қазақстан Республикасының Қылмыстық кодексінің 264-бабы, яғни „Трансұлттық ұйымдасқан топты құру„, 394-бабы, яғни „Заңсыз көші-қонды қылмыстық топ арқылы жасау„ бойынша кінәлі деп танылды. Аталған баптар бойынша сотталушыға түзеу колониясының қатаң режимінде 10 жылға бас бостандығынан айыру жазасы, қалған сотталушыларға мүліктерін тәркілей отырып, түзеу колониясының жалпы режимінде 8 жылдан бас бостандығынан айыру жазасы тағайындалды.
Таксист рөліндегі тағы бір сыйбайласқа топ адаммен алдын ала сөз байласуы арқылы заңсыз көші-қонды ұйымдастырғаны үшін 3 жыл мерзімге бас бостандығынан шектеу жазасы тағайындалды.
Сот үкімі заңды күшіне енген жоқ.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе