Қаржы полициясының бұрынғы қызметкері, атышулы «Қорғас ісі» бойынша басты куәгер Талғат Махатов адам өліміне күдікті ретінде ұсталды.
Бұл туралы Sputnik Қазақстан хабарлады.
«Алматы қаласының вестомствоаралық жедел-тергеу тобы кеден саласының бұрынғы қызметкері Жамашев М.К-нің 2012 жылдың 6-маусымында өлтірілуіне іске қатысты бірқатар күдікті адамдар ұстады, оның ішінде «Қорғас ісі» бойынша басты куәгер болған Талғат Махатов та бар», делінеді Алматы қаласы прокуратурасының баспасөз қызметінің хабарламасында.
Қазақстан мен Қытай арасында ұзақ уақыт бойы контрабандамен айналысқан қылмыстық топты Қаржы полициясы 2011 жылы анықтаған еді. 2013 жылдың маусым айында сот процесі басталып, 2014 жылдың сәуірінде 45 сотталушы түрлі жазаға кесілген болатын. Ең ұзақ мерзім – 16 жылға қылмыстық топ құрды делінген Талғат Қайырбаев сотталған еді.