Атырауда мемлекеттік бағдарламаның ақшасын „жегендер„ сотталды
Атырауда тұрғын үй модернизациясына бөлінген 18 млн теңге қолды болды.
Бұл туралы Атырау облыстық сотының баспасөз қызметі хабарлады.
Атырау қаласының № 2 сотында «Қаладағы тұрғын үйлерге коммуналдық қызмет көрсету» ЖШС-нің бас есепшісі, «EuroMobile Қазақстан» ЖШС-нің директоры және «Кенесов М.М.» жеке кәсіпкерлігі басшысына қатысты қылмыстық іс қаралды. Сотта анықталғандай, сотталушы М. өзіне сеніп тапсырылған бөтен мүлікті жымқыру мақсатында «Қаладағы тұрғын үйлерге коммуналдық қызмет көрсету» ЖШС-де бас есепші бола тұра, сыбайластарының көмегіне жүгініп, тұрғын үйлерді модернизациялау мемлекеттік бағдарламасына араналған 18 288 465 теңгені жымқырған.
Сот үкімімен бас есепші ҚР Қылмыстық кодексінің 189-бабының 4-бөлігінің 2-тармағымен, яғни „Сенiп тапсырылған бөтен мүлiктi иемденiп алу немесе талан-таражға салу„ бойынша кінәлі деп танылып, «ҚР Тәуелсіздігінің 25 жылдығына байланысты рақымшылық жасау туралы» Заңын қолдану арқылы 3 жыл 6 ай мерзімге бас бостандығынан айыру жазасы тағайындалды.
Сондай-ақ ЖШС-тің директоры мен жеке кәсіпкер Қылмыстық кодекстің 28-бабының 5-бөлігі, 189-бабының 4-бөлігі 2-тармағымен, яғни „Көмекшілердің сенiп тапсырылған бөтен мүлiктi иемденiп алу немесе талан-таражға салу„ бойынша кінәлі деп танылып, оларға 7 жыл мерзімге бас бостандығынан айыру жазасы тағайындалды.
Жаза өтеу орны ретінде жалпы режимдегі түзеу колониясы белгіленді. Сот азаматтық талапты қанағаттандырып, сотталушылардан келтірілген шығынды өндірді. Сот үкімі заңды күшіне енді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе