Атырауда автобус жүргізушілерінен тұрақты түрде ақша бопсалаған салафиттер ұсталды
ҚР Ұлттық қауіпсіздік комитетінің Атырау облысы бойынша департаменті жолаушылар тасымалымен айналысатындарды бопсалап келген топты ұстады.
Бұл туралы ҚР ҰҚК баспасөз қызметі мәлім етті деп хабарлады ҚазАқпарат.
«Атырау қаласында 2 жыл бойы «Атырау-Астрахан», «Атырау-Орал», «Атырау-Бейнеу» бағыттарында жолаушыларды тасымалдаумен айналысатындардан ақша бопсалаумен жүйелі түрде айналысып келген адамдар тобы құрықталды.
Аталған бағыттарда 200-ге жуық автокөлік жүріп-тұрған. Ай сайын әр көлік жүргізушісінен көлемі 5 мыңнан 25 мың теңгеге дейін ақша алынып отырған.
Ұсталған тұлғалар деструктивті бағыттағы дәстүрлі емес салафиттік ағымның ұстанушылары болып табылады», – деп атап өтілген ҚР Ұлттық қауіпсіздік комитеті таратқан хабарламада.
Аталған қылмыс ҚР Қылмыстық кодексінің 194-бабы 2-бөлігінің 2 және 3-тармақтарында көрсетілген қылмыс белгілері бойынша сотқа дейінгі тергеп-тексерудің бірыңғай тізіліміне тіркелді.
«Топтың алты белсенді мүшесіне қатысты күзетпен қамауда ұстау түріндегі бұлтартпау шарасы қолданылды», – деп нақтыланған таратылған мәліметте.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе