Атырауда халық емшісі мүгедек жанды емдеймін деп өлтіріп алды.
Бұл туралы облыстық соттың баспасөз қызметі хабарлады.
13 жыл бойы төсек тартып жатқан ІІ-ші топтағы мүгедек анасын ұлы емшіге емдетуге алып барған. Емдеу кезінде емші науқастың сырқат аяқтарын күштеп созып, қолымен тізесін басқан. Сол кезде әйелдің ышқына айқайлаған жан дауысы шығып, талықсып кетеді. Бірден жедел жәрдем шақыруға тура келеді. Салдарынан жәбірленуші аудандық емханада травматикалық шоктың әсерінен қайтыс болады.
“Атырау облысының Махамбет аудандық сотында Қазақстан Республикасының Қылмыстық кодексінің 104-бабының 1-бөлігібойынша сотталушыға қатысты қылмыстық іс қаралды. Сот отырысында сотталушы О.Н. және оның қорғаушысы мен аудан прокурорымен кінәні мойындау туралы процестік келісім жасақталды”, – делінген хабарламада.
Сот үкімі заңды күшіне енді.