Астанның әкімі Әсет Исекешев әлеуметтік желілерді қолданушылардың жедел жәрдем көмегі қызметіне қатысты айтқан сынына жауап берді.
Әлеуметтік желіні пайдаланушы Саке Рахат деген азамат «Астана – Не? Қайда? Қашан?» атты топта жедел жәрдем қызметіне сын тағып, әкімге дат айтқан еді. Кешірек бұл пікірсайысқа елорда әкімі Әсет Исекешевтің өзі қосылды.
«Қайырлы кеш! Өзіңіздің мекенжайыңызды хабарлауыңызға болады. Қазір бәрін тексереміз. Осы күндері жедел жәрдем көмегіне жүгінушілер саны көбейіп кетті. Орташа есеппен алғанда тәулігіне 1,5 мың шақырту түседі, кеше қоңыраулар саны тіпті 3 мыңнан асты. Әрине, жедел жәрдем қызметі тәулік бойына атқарылады. Достар, кез келген уақытта қандай да бір қиындықтар туындап қалуы мүмкін.
Маған әкім ретінде болашақта тиісті шаралар қолданып, ведомствоның жұмысын жетілдіріп отыру үшін осындай жағдайлар туралы біліп отыру керек. Кез келген уақытта қандай проблема болмасын біздің сайтымыздағы арнайы ашылған бөлімге жазыңыздар. Онда операторлар отыр. Олар тәулік бойына сол мәселелерді анықтап, тіпті тиісті шешім де қабылдайды. Күн сайын маған сағат 8-00-де қалыптасқан жағдай жөнінде есеп беріледі»,-деп қосты әкім.
«Әдетте мұндай проблемалар бізде жоқ. Алайда, өткір респираторлы жұқпалы инфекциялар көбейген кезде бригадалар жетіспей жатады. Бүгін міне, барлық 84 бригада жұмысқа шықты, оған қосымша біз емханалардан 84 жедел жәрдем бригадаларын қостық. Бүгін 3 мыңнан астам қоңырау түсті. Келесі жылы бригадалар санын көбейтеміз. Қазір канадалық сарапшыларды тарттық.
Астанада ауруханалар жетерлік, бірақ ең алдымен жедел жәрдем жүйесінің тиімділігін арттыру керек. Мен үшін бұл маңызды. Видеода жаңа жедел жәрдем орталығының жұмысы көрсетілген. Барлық көліктерге навигаторлары орнатылған, логистика қайта құрылды. 31 көлік сатып алдық. Келесі жылы тағы да сатып аламыз. 2017 жылы жедел жәрдем сапасы айтарлықтай жақсарады деп үміттенемін», – деп жазды Әсет Исекешев Фейсбук тобына.