Полиция отбасын құру мақсатында алып-қашқан Роза Ғұбарованы тек БАҚ-тағы жарияланымнан кейін іздестіре бастаған.
18 жастағы колледж студентін туыстарының айтуынша, бойжеткенді алып-қашу 26-қыркүйекте Жамбылы облысы Қордай ауданының Трудовик ауылында орын алған. Ата-анасы қыздарын бір тәулік бойы өз беттерімен іздепті, бірақ таба алмаған. Тек бір тәуліктен кейін оларға бойжеткенді үйленіп, отбасын құру үшін көршілес Мичурино ауылының тұрғыны Хан-Хан Ибрагим деген азаматтың алып-қашқанын хабарлаған.
Қордай аудандық ішкі істер басқармасына жазылған арыз да еш нәтиже бермеген. Полицияның жедел өкілетті уәкілдері бойжеткеннің ата-анасына қыздары өз еркімен тұрмыс құрғысы келетіні туралы өз қолымен жазған-мыс қолхатын көрсеткен.
Сөйтсек, осы қолхат полицейлерге бойжеткенді мүлдем іздемеуге негіз болыпты
олар, тіпті, бойжеткеннің тұрмыс құру жөніндегі шешімді өз еркімен қабылдағанын анықтауға да басын ауыртпапты.
— Біз шу көтергеннен кейін полицияға Розаға араша түскен американдықтар да келіпті. Бірақ тәртіп сақшылары оларға келесідей уәж айтыпты:
бұл біздің ұлттық дәстүріміз!
Одан кейін дүнген мәдени орталығының төрағасы барыпты. Амалы таусылған тәртіп сақшылары бойжеткенді кешке көрсету жөнінде уәде беріпті, бірақ артынан өзгеріп шыға келіпті. Алдымызда демалыс – сенбі және жексенбі күндері тұр деп, мемлекеттік ұйымдардың жұмыс істемейтінін алға тартыпты. Яғни, алып-қашушыларға дүйсенбіге дейін бойжеткенді көндіруге уақыт берген сыңайлы. Сөйтіп, ата-анасы қыздарын көре алмай қойды, — дейді оқиғаның мән-жайын әңгімелеген алып-қашып кеткен Роза Ғұбарованың туысы Айман.
Жағдай бұл туралы БАҚ-та мақала шыққаннан кейін өзгеріп сала берді. Күтпеген жерден полиция алып-қашушыларды іздестіре бастады.
— Тәртіп сақшылары бойжеткеннің туыстарымен бірге Розаны жасырып қоюы мүмкін деген үйлерді аралай бастады. Содан кейін біреулер алып-қашушылардың туыстарына «бір апта бойы көндіре алмадыңдар — қызды қайтарыңдар», деп қатты айтқан болулары керек. Ертеңіне сағат 11-де тәртіп сақшылары екі тарапты – алып-қашушыларды және бойжеткеннің отбасын – полиция бекетіне шақыртты. Сөйтіп, сол жерге әкелінген Розаны ата-анасына табыс етті, — дейді Айман.
Сол жерде Роза Ғұбароваға „алып-қашушыға артатын кінәң бар ма?„ – деген сұрақ қойылды. Бойжеткен „бар„ деген жауап беріп, оның үстінен арыз түсірді.
Жамбыл облысы Қордай аудандық басқрмасындағылар аталмыш факті бойынша сотқа дейінгі тергеу басталғанын хабарлады
— Ол кешқандай келісім бермеген. Аталмыш қолхатты Розаға зорлап жаздыртқан. Қорқытып, үркіткеннен кейін, тезірек құтылатын шығармын деп, жазып бере салған, — дейді әңгімесін жалғастырған Айман.
Алып-қашушылар жұртшылықты осы қолхатпен бойжеткен алып-қашуға да, тұрмыс құруға да өз еркімен барды деп сендірмек болған.
Роза Ғұбарова қазір үйінде жүр, ол соңғы аптада басынан кешіргендерін тезірек ұмытуға тырысуда. Жеті күнге созылған зорлық-зомбылық бойжеткеннің рухын түсіріп, жігерін жасыта алмады, ол болашаққа үмітпен қарап, жоспарлар құруда.
— Розаның сөз байласып жүрген жігіті бар, ол алдағы көктемде, колледждегі оқуын аяқтағаннан кейін тұрмыс құрмақшы. Өзін алып-қашқан жігітті дұрыс танымаған. Қазір ол азаматтың үстінен қылмыстық іс қозғалды.Енді оның туыстары біздің аяғымызға жығылып, арызымызды қайтып алуды сұрап жүр, — дейді әңгімесін тәмәмдаған Айман.
Розаны алып-қашып кеткеннен кейін бірнеше күн өткенде қызының тағдырына алаңдаған анасы жүрегінің талмасы ұстап, аруханаға түскен болатын. Қазір барлығы орнына келгеннен кейін, жүрегі орнына түскен ананың денсаулығы түзеле бастады.