Алматының №165 мектеп-лицейінде сероз менингитпен ауырған жағдай анықталды.
Бұл туралы қалалық қоғамдық денсаулықты сақтау департаменті Tengrinews.kz басылымына хабарлады. Ведомстводағылар 25 мамырдан бастап балалар демалыста екенін айта кетті.
«2018 жылдың 24 мамырында №165 мектеп-лицейі оқушыларының арасында сероз менингит тіркелді. Диагнозы клиникада анықталды. Сырқаттың лабораториялық анализдерінің қорытындысы тексеріліп жатыр. Басқа жағдай кездеспеді. Онымен байланысқан жандар мекенжайы бойынша медициналық бақылауға алынды. 25 мамырдан бастап оқушылар жазғы демалыста», – делінген хабарламада.
Департаменттің хабарлауынша, 2018 жылдың 25 мамырына дейін менингокок инфекциясына күдікті 50-ден астам адам стационарға жүгінген. Олардың ішінде 23 адамның диагнозы лабораториялық тұрғыда расталды. Алтауы клиникалық бақылаудан кейін белгілі болды. Барлығына ем жазылды. Денсаулығы жақсарған үш пациент үйіне шығарылған. Ауруы бірден асқынып кеткен төрт адам қайтыс болды.