Алматыда журналистің өліміне қатысты мән-жайлар хабарланды, дейді inform.kz.
Алматы қалалық Ішкі істер департаменті Hit tv телеарнасының продюсері Әйгерім Мұсаеваның өліміне қатысты мән-жайды айтты.
«Тепловоз жас келіншекті қағып кеткен. Жеке тұлғасын растайтын құжаттар өзімен бірге болмаған. Сот-медициналық сараптама өткізу үшін мүрде қалалық мәйітханаға жеткізілді. Әйгерім Мұсаеваны туған ағасы таныды. Қазіргі уақытта көліктегі ішкі істер департаментінің қызметкерлері тергеу жұмыстарын жүргізуде», – деді Алматы қалалық ІІД-нің ресми өкілі Салтанат Әзірбек.
Сондай-ақ мәлім болғандай, 20 қазан күні кешкі 17:05-те Алатау ауданының тұрғыны полицияға хабарласып, бір күн бұрын отбасылық кикілжіңнен соң 27 жастағы әйелі Әйгерім Мұсаева үйінен кетіп қалғанын айтқан.
Екі баланың анасы Hit tv арнасында продюсер болып жұмыс істеген.
Мұның алдында журналистің әріптестері Әйгерімнің жоғалып кеткені туралы әлеуметтік желіде жазып, көмек сұраған еді.
Еске салайық, бұған дейін Алматыда жоғалып кеткен журналистің мәйіті табылған болатын. Қазақстандық журналист, продюсер Әйгерім Мұсаеваның жоғалып кеткені жайлы ақпарат әлемеуттік желіде тараған.