Картоп, пияз, сәбіз бен қызылша сияқты көкөніс өнімдері бағасының шарықтауына тосқауыл қою мақсатында Алматыда Ауыл шаруашылығы және ветеринария басқармасы мен «BN-ORDA» ЖШС-і арасында меморандумға қол қойылды.
Өйткені халық күнделікті тұтынатын осы өнімдердің бағасы көктемде қымбаттап шыға келетіні жасырын емес.
Қол қойылған меморандумның мазмұнына сай, «BN-ORDA» ЖШС-і бағаны ауыздықтау үшін қаладағы базарлар мен сауда орындарын құны арзандатылған ауылшаруашылығы өнімдерімен қамтамасыз етпек.
Осылайша сауда орындарына жеткізілетін өнім өзінің нарықтағы құнынан 15%-ға төмендетілген бағамен өткізіледі.
Ал Ауыл шаруашылығы және ветеринария басқармасы қаладағы барлық сауда орындарының тізімін береді.
Меморандум 30 күндік мерзімге жасалды, оны жүзеге асыру 10-шы наурызда басталып кетті.