Алматыда экскурсиялық автобустар арнайы жолақпен жүретін болады
Қалалық Туризм және сыртқы байланыс басқармасының басшысы Ерлан Жайлаубайдың айтуынша, экскурсиялық автобустарға арнайы тұрақ бөлуге және автобус жолағымен жүруге рұқсат беру туралы ауызша келісім жасалған.
Алматының туристік әлеуеті туралы өткен қоғамдық кеңес отырысында экскурсиялық автобус бағдарларының дамуы туралы мәселе көтерілді, деп хабарлайды ҚазАқпарат тілшісі.
«Қазір мамандармен біріге отырып тұрақ орындарын белгіледік. Әкімшілік полициямен ауызша келісім бар. Меморандумға қол қоюға әзірлік бар. Сонымен қатар, экскурсиялық автобустарға арнайы автобус жолағымен жүруге рұқсат беретін жол қозғалысы ережелеріне өзгеріс енгіземіз. Келер туристік маусымның басында жұмыс аяқталады», – деді Ерлан Жайлаубай.
Оның айтуынша, қазір қалада жаңа туристік автобус бағдарлары жасалып жатыр.
«Электробустарға сұраныс көп. Алматыда екі бағытта туристік электробус жүріп тұр. Көліктер Smart-туризм компаниясының аудиогидтерімен жабдықталған. 1 500 теңгеге кез-келген адам Алматыны аралай алады»,- деді Ерлан Жайлаубай.
Айта кету керек, туристік бағыттағы қос электроавтобус 13 қазанда жолға шыққан болатын.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе