Алматы облысында жыл басынан бері 1558 өрт оқиғасы тіркелді

Алматы облысының аумағында 2017 жылдың басынан бері 1 558 өрт оқиғасы тіркеліп, тілсіз жаудың салдарынан 170 млн. 044 мың теңгенің материалдық шығыны келтірілді. Өрттерде 18 адам қаза болды, 34 адам әртүрлі дәрежеде жарақат алды.

Бұл туралы Алматы облысының ТЖД өрт қауіпсіздігі саласындағы бақылау және профилактикалық қызмет басқармасы хабарлады.

Басқарманың келтірген дерегіне сүйенсек, 2017 жылдың қарашасы мен өткен жылдың осындай кезеңі аралығында өңірде тіркелген өрт дерегі 28 процентке өскен, ал материалдық шығын 37 процентке артқан. Дегенмен кісі шығынын болдырмауға жасалған әрекет өз нәтижесін беруде. Былтырмен салыстырғанда өрттен қаза болғандар саны 28 процентке төмендепті, ал қызыл жалынға оранып, жарақат алған адамдар саны 33 процентке төмендеген.

Өрт көбінесе тұрғын секторында болады. Мысалы, жеке тұрғын үйлерде 1088 өрт оқиғасы тіркелген, бұл барлық өрт көлемінің 69,8 процентін құрайды.

Ағымдағы жылдың 15-қазанынан бастап облыстың жеке тұрғын үйлерінде от жағу маусымы басталды, яғни тұрғын секторда адамдардың пештен шығатын улы газдан улануы аса алаңдаушылық тудырып отыр. Оған себеп тұрғындардың жылыту пештерін орнату және пайдалану кезінде өрт қауіпсіздік ережелерін орындамауы болып табылуда.

Сонымен, жыл басынан бастап 36 адамға иіс тиген, 8 адам қаза болды, олардың ішінде 4 бала, 28 адам ауруханаға жатқызылды, олардың ішінде 9-ы – бала.

Статистика көрсеткендей, басым бөлігінде улы газдан халықтың әлеуметтік осал топтарынан шыққан азаматтар улануда.
Тұрғындардың улануына негізгі себеп – пештің мұржасына баратын түтін жолының бітеліп қалуы, пеште ыс тұрып, жарықтардың пайда болуы, жөнделмеген пеш құрылғыларын пайдалану, пештің жабық жапқышы немесе пештің түтін тартпай қалуы.