Алматы облысында қаржы пирамидаларына алданғандардың қатары артып барады.
Өткен жылы Алматыда «ФинСтатус» жауапкершілігі шектеулі серіктестігінің құрылтайшыларына үкім шыққан болатын деп хабарлады „Хабар-24„ телеарнасы.
Өйткені компания өкілдері «ақшаңызды еселеп қайтарамыз» деп жұртты алдап келген. Бұл қаржы пирамидасына қатысқан облыс тұрғындарының қарасы көп. Өкінішке қарай, олардың қатары азаяр емес.
«Квеста Холдинг» дейтін мекеменің қызметінде қаржы пирамидасының барлық белгілері бар»
, – дейді прокурорлар.
Бұл мекеме туралы мәліметтер Панфилов және Талғар ауданында да белгілі болды. Осыған ұқсас тағы бір күдікті қауымдастық Ақсу ауданында анықталған. Оның қызметін пайдалануға 100-ден астам адам тіркелген. Нәтижесінде бәрі сан соғып, алданғандар болып шықты. Қазір бұл істер бойынша қылмыстық тергеу амалдары жүріп жатыр.
Данияр Мұхияев, облыстық прокуратурасының басқарма прокуроры:
– Барлық салымшыларды санап шығу әзірге мүмкін болмай тұр. Тергеу енді басталды. Залал шеккендер түгел анықталады. Ал қаржылық пирамиданы құрып, оны жарнамалағандар әкімшілік және қылмыстық жауапкершілікке тартылады.