Алқабилер соты бейсенбі күні бес сотталушыны Борис Немцов өліміне кінәлі деп таныды. Олар – Шешенстан ІІМ “Север” батальонының бұрынғы жауынгерлері Заур Дадаев, Анзор және Шадид Губашевтер, Тамерлан Эскерханов және Хамзат Бахаев. Алқабилер бұл жауынгерлердің бәрі бір топта әрекет еткен және оларға кешірім жоқ дегенмен келісті.
Алқабилер үш күн бойы Мәскеу округтық әскери сотта ақылдасты.
Тараптар шығарылған үкімді 11 маусымда талқылайды.
Немцовтың өліміне қатысты іс бойынша сот өткен жылы қазанда басталды. Тергеу шабуылға тапсырыс беруші әрі ұйымдастырушы ретінде Шешенстан ІІМ бұрынғы қызметкері Руслан Мухудиновты атады. Оған іздеу жарияланды.
Немцовтың туыстары мен жақтастары саясаткердің өліміне Шешенстан басшысы Рамзан Қадыровтың қатысы бар деп отыр. Олар қылмысты ұйымдастырушы ретінде “Север” батальоны командирінің бұрынғы орынбасары Руслан Геремеевті атады. Бірақ екеуі де тергелген жоқ.
Борис Немцовты 2015 жылы 27 ақпанда Мәскеудегі Үлкен Москворецк көпірінде өлтіріп кетті.