Тәжікстан “Уральские авиалинии” әуе компаниясының Душанбеге жасалатын рейстеріне тыйым салды. Тәжік билігі “Сомон Эйр” әуе компаниясының Ресейдің бірнеше қаласына ұшуға тыйым салғанына осылайша жауап берді.
Тәжікстан көлік министрлігінің азаматтық авиация департаментінің басшысы Юсуф Рахмонның РИА Новости агенттігіне хабарлауынша, Ресейдің төрт қаласы – Краснодар, Красноярск, Уфа және Челябинскіден Душанбеге жасалатын рейстер тоқтатылған.
Еске салсақ, Ресейдің көлік министрлігі 23 желтоқсанда тәжіктің “Сомон Эйр” әуе компаниясының бірнеше қалаға жасалатын рейстеріне тыйым салды.
Бұған дейін Тәжікстан әуе билігі ресейлік “Ямал” әуе компаниясының Душанбеге жасалатын рейстеріне тыйым салған еді. “Сомон Эйрдің” рейстеріне тыйым қанша уақытқа созылатыны әзірге белгісіз. Тыйым Қазан, Иркутск, Оренбург, Сочи және Новосибирск бағыттарына салынды, ал Мәскеу және Санкт-Петербург қалаларына “Сомон Эйр” ұшақтары бұрынғы кесте бойынша ұшып жүр.