Алматының Алғабас шағынауданында тағы бір үй қисайып қалды. Тұрғындар Ішкі істер министрлігінің Төтенше жағдайлар комитетіне осындай шағым түсірген. Қазір аталған ақпараттың анық-қанығы тексерілуде.
Комитеттің ресми өкілі Руслан Иманқұловтың айтуынша, қисайған Алғабас-6 шағынауданындағы тоғызқабатты үйлердің бірі.
Комитет дерегінше, тоғызқабатты үйге тұрғындар биылғы жылдың 27-шілдесінде қоныстанған екен. Мұнда барлығы 54 пәтер бар.
Қазіргі күні Алматы қалалық Төтенше жағдайлар департаментінің және қалалық әкімшілік Құрылыс басқармасының мамандары осы жерде жүр.
Айта кетелік, бұдан бұрын Алғабас-6 шағынауданында тағы бір үй қисайып қалған еді. Тұрғын үйді 2014 жылы “Астана құрылыс” компаниясы тұрғызған болатын. Мұнда барлығы 72 пәтер бар. Тұрғындар мемлекеттік бағдарлама бойынша бұл жерге 2015 жылдың қазанында қоныстанған еді. Аталған жағдайдан кейін шағынаудандағы барлық көпқабатты үйлер тексеруден өткізілген болатын.