Ақтөбедегі «Заречный-4» ауданының тұрғындарынан бір айдан бері маза кеткен. Себебі жеке кәсіпкер үйлердің тап іргесінен газ құю бекетін салмақ ойы бар екен, деп хабарлайды 24.kz.
Бірақ бұрын ол жерде жанар-жағармай құю бекеті болыпты. Кейін бекет жабылып, ұзақ жыл қараусыз қалған. Кезінде жанар-жағармай құю бекеті жабылғаннан кейін айналасындағы жер телімдері жекенің құрылысына сатылып кеткен.
Қуантай Ермұхамбет, қала тұрғыны:
– Бізге сатқан адам бұл жанар-жағармай құю бекеті 5-6 жыл жұмыс істемей тұр деді. Негізі салынғанына 15-16 жыл болған. Бір айдың шамасында мына жерді тазартып, қоршауды алып кетті. Газ құю бекетін саламыз деді. Енді жер қатынастары бөліміне барсақ, айтады: «Аға, олардың статустары сіздерден бұрын алынған, салуға құқықтары бар», – дейді. Үйдің қасына неге рұқсат бересіздер деп айттым.
Бұл бекеттің үйлердің ауласына жақын тұрғаны соншалық, арада адам өтетін жер жоқ. Атқарушы билік өкілдері бұл мәселеден хабардар болғаннан кейін ескі бекетті сатып алған кәсіпкерді іздеуге кірісті.
Ұшқын Мыңбаев, қалалық жер қатынастары бөлімінің басшысы:
– Санитарлық талаптарға сәйкес, жеке тұрғын мен жанар-жағармай құю стансаларының арасы СНИП-ке сәйкес, 50 метрден кем болмауы керек. Яғни аталған нысананы мақсатына сәйкес пайдалану мүмкін емес. Бұл кәсіпкердің байланыс телефондарын қарап жатырмыз, қазір хабарласамыз, шақырып, сөйлесеміз. Жанар-жағармай бизнесімен айналысамын десе, басқа жер учаскесін ұсыну жағын қарастырамыз немесе нысаналы мақсатын өзгертіп, сол аумаққа қажетті кәсіп түрін ашуға көмектесуге дайынбыз.
«Заречный-4» тұрғындары бұл ауданға не салу қажеттігін өздері ұсынды. Бұл маңда ірі сауда орны жоқ. Спорт нысандары да жетіспейді.
Ырысжан Есекенова, қала тұрғыны:
– Әр 50 метр сайын бұл жерде жанармай құю бекеті. Одан да біздің тілегіміз, сол жасөспірім балалар демалып, ойнайтын жері жоқ. Неге осы жерге бір спортпен айналысатын демалыс орнын салмайды. Бір кешен салсын.
Тілшілерге шағымданған тұрғындардың тілегі аяқ асты қалмады. Қала билігі ол жерге газ құю бекетінің салынбайтынын айтып, кәсіпкерге басқа аумақтан жер телімі беріледі деп шешті.
Авторлары: Ақсәуле Байменшина, Болат Молдағалиев